Du bisch ufem Weg zu mier
de Föhnsturm verwuschlet dini Hoor
und sin Duft leit sich uf dini Huut
wenn du ine chunnsch,
mii id Arme nimmsch,
schnuufi tüüf ii und gnüsse
still lächelnd –
Bis du bi mier bisch
los ii das Lied
woni letscht Nacht
s’erscht mol ghört han
das Lied voller Sehnsucht
Wenn du bi mier bisch
du mi mit ere Umarmig
und emene zärtliche Kuss
begrüesst hesch
wenn du bi mier bisch
du mier id Auge glueget hesch
und dini Hand mis Gsicht
berüehrt het –
Bis du bi mier bisch
los ii das Lied
woni letscht Nacht
s’erscht mol ghört han
das Lied voller Sehnsucht
Stunde voller Zärtlichkeit
rede und lache,
Musig lose
zäme sii –
nur du und ii
es git kei anderi Welt meh
und wenn du wieder gohsch –
Los ii das Lied
woni letscht Nacht
s’erscht mol ghört han
das Lied voller Sehnsucht -
los ii das Lied
bis du wieder bi mier bisch.
