Gedichte
Das Weinviertel - ein Mundartgedicht

Mia Weiviertla san a gaunz eigene Rass,

san ehrlich und fleißig, vastengan an Gspaß,

haum ka Aungst vo da Orbat, schau um di im Laund,

am Föld und im Haus siagst a fleißige Haund.

Kimmt a Fremda zu uns sa ma freindlich, net mehr.

Ma frogt si jo doch: Wo kimmt er denn her?

Fria woar ma unta uns, de Grenzn fest zua,

jetzt haum ma a Autobaun, aus is mit da Ruah.

Wir sollen uns öffnen, brauchen Fremdenverkehr!

Ih bi ma net sicha: Wolln d´Fremdn a her?

Bei uns gibt´s ka Äktschn, kane Berge, ka Meer,

und wird´s amoi ochte, san d´Stroßn scho leer

.

Glaubt ana, dass er bei uns s große Obenteuer findt,

wa´s vielleicht bessa, waun er wieda vaschwindt

Stott Wossaschi foahrn kaunnst Schwammerln suachn,

oba findts net glei oa, bitte net fluachn..

Fia uns, do muaßt Zeit haum, a Gfühl fia d´Natur,

daun findt´s scho a Platzerl fir´s Glick afoch pur

.

Hoch zu Roß oda am Esel aus Droht,

a mit an Kanu auf da Moarch, hör´ih jetzt grod,

so kaunst as kennalerna unsa schens Landl.

Schau das amoi au in Frühjohrsgwandl.

Stöll di hi zu an Rapsföld waun´s gagerlgölb bliaht,

hear zua den Hummeln waun´s summan ea Liad.

Schau obe ins Morchföld, waunn de Mähdrescha fohrn,

soweit oist segn kaunst, nea goldgölbes Korn.

Geh eini in d´Mittn vo an Sonnenblumenföld,

und sog ma, wo is nau schena auf da Wölt?

Foahr obi zu da Moarch, ins Vogelparadies,

zeitli in da Fruah, waunn ´s am schensten is.

Mia haum Burgen und Schleßa, historischen Bodn,

nea auf so ana Erd kaun a Weiviertler grodn.

Gehst gegn´da´Nocht amoi durch a Köllagoßn,

wird di vielleicht oana trinka loßn,

mit´n Tupfa aus´n Faßl, köllafrisch,

a  Kasbrot dazua und deckt is da Tisch.

Kimmst z`recht zum Lesn und kriagst an frischn Most,

daunn sog bitte Mahlzeit und jo net Prost.

So kennt ih nau stundenlaung weidadazöhln,

oba wia gsogt, des Landl muaß ma wölln.

Doch host mi wirklich vastaundn und findts as a guat,

daunn steckt in dir sicha a des Weiviertlabluat.