Gedichte
Unsere Matura - ein Mundartgedicht

(im Schulmuseum Michelstetten)

Waunnst fria nix glernt host, wor´s weita ka Gfrett,

daunn host holt orbatn miassn, host wolln oda net,

heitzutog rennans nea olle studieren

fia´s orbeiten tuat se kana interessiern.

Mit da Matura zum Beispül, gebn s gor so vül au,

oba waunnst mi frogst, do is gor nix drau,

wieso ih des waaß, in Michelstettn hob ih´s gmocht,

und ih sog eich as ehrlich, ih hob nua driba glocht.

A gaunza Bus voll wor ma durt, jeda wor dabei,

vül haum ma ghert und a gsegn mauncherlei,

Grechnet haum ma brav mit da Kugerlmaschin

Knochn haum ma gsuacht in da Banakistn drin.

Schreiben haum ma glernt, kurrent und latein,

  kapierst as net glei, daunn  trichterns dirs ein

De Eselbaunk gaunz hintn, wor net laung leer,

es san a durt gsessn, oba ih varrot eich net wer.

Grod wia ma glaubt haum, d´Schul is bold aus

täuln´s scho da Reih noch d´ Maturafrogn aus,

In Nauman sollst schreiben in da Spiaglschrift

oba host an Spiagl in Taschl, di sowos net trifft.

A de römischen Zohln host miassn kennan

und de Kugerlmaschin mit´n Nauman nennan,

und nau a poar gaunz hagliche, knifflige Frogn

oba mir haums dapackt, mehr kaunn ih net sogn.

A bissl ohschreibn und eisogn, des wa do glocht,

sche gemeinsaum haum ma olle de Matura gmocht,

und des Schenste wor, des is doch ka Frog

de  Maturafeier daunn am Nochmittog.

Erst a Schnapserl in Poysdorf in ana Brennerei,

waunn ich´s genau nimm, wor sogor a zweites dabei

und zum Obschluß beim Heirigen in Mistelboch,

hob ih ibalegt, ob ih net d Matura nau amol moch.

Mia hot´s guat gfolln im Schulmuseum

und vielleicht feia ma a Maturajubiläum

kennt sei se lonatn uns naumol ei,

a so a Klassenreffen kennt wirkli lustig sei.