Gedichte
Mei Post - in Mundart

Jeden Tog in da Fruah, so uma neine,

schau ih neigierig in mei Postkastl eine,

oba ollwl gibts nua Reklamezetteln

waunn ih ollas kafat, miasst ih bettln.

A poar Erlogscheine, de kunnt ih leicht entbehrn,

s Finanzaumt wüll wieda vo mia wos hern.

San a a poar blaue Briaf dabei

schmeiß ih ´s in de Tonne, oba glei,

waunns s schau aufaungan... binnen 14 Tagen,

sonst sehen wir uns gezwungen, sie zu klagen...

Na, Verständnis gibt´s kans mehr auf d Wölt,

olle wolln nua ans, nämlich mei Göld,

doch des brauch ih sölba, vasteht mi denn kana,

bei an Blick auf mei Konto kummt ma des Wana.

Fria hot ma an Briaf mit da Haund no geschrieben,

do host wos ghobt, des is da bliebn

do host no a Kortn kriagt vom Palmenstraund

heit kriagst a SMS aus jedem Laund.

is des vielleicht schena, do kaunn ih nua lochn,

doch des is da Furtschritt, wos soll ma mochn.

Liebesbriaf mit Herzerln auf rosa Papier,

findts nua  in Museum, ih kau nix dafia,

dabei hätt ich sogern amal so a Briafarl glesen,

leider is des ollas vor meina Zeit gwesn.

So hol ih holt wieda meine Reklamezettln,

und frog mi, wer kummt heit wieda bettln,

dabei tät ih mi über jede Nochricht gefrein

si muass jo net grod vom Finanzaumt sein.