Gedichte
Beim Schneiden - ein Mundartgedicht

Beim Schneiden

De Feiertag san vorbei, wor a friedliche Zeit

des Essen wor guat, de Kinda haum se gfreit,

de Antschitant is hamgfohrn, heit in da Fruah

vierzehn Tog wor´s do, is eh laung gnua.

Wos sollst mit ihr redn, sie vasteht jo net vül,

frogt noch mein Leben, wos ich hob fia a Zül,

Wos soll ich ihr sogen? Wia weh as des tuat

ziagn de Kinda glei noch da Schul scho furt.

Sogn de Orbeit am Föld is schwa, ka Vadienst,

mei Vota hätt mi gfrogt: Sog Bua, spinnst?

Kummans nocha wieda ham auf a por To

san gsund und glicklich, daunn bist froh.

Ich wia holt jetzt wieda in Weiart braucht,

do is de Luft eh bessa, net a bisserl varraucht,

In Winta, waunns kolt is und es liegt da Schnee,

tuat s Schneiden dem Weistock am wenigsten weh.

Mit an Weistock is grod so, wia mit an Kind

föhlt eahm da Holt, vadraht eahm jeda Wind,

und wia bei de Leit trogn maunche fia zwoa,

de schneidt´s gaunz kurz, lost as rostn a Johr.

Aundare haum nea schene Blattln, vül Holz,

nau denan muasst nehman eahnan Stolz

wäul es muass a jeda sei Leistung bringa,

tuat as net allaa, muass man holt zwinga.

Im Weiart is, wia im richtigen Leben,

mauncha wird gstutzt, a aundara trieben,

Für´n Wein muasst a Herz haum und a G´schick,

kaunnst de net valoss allaa nur aufs Glick.

Mit an Weistock muasst reden, um Gottes Wölln,

des kaunn ih wirklich net da Antschi dazöhln,

De redt nur vom Theater und von Kultur

und hot ka Auhnung vom Leben mit da Natur.

Sie kennt holt nur ihr eigene Wölt,

doch ih mecht net tauschen, net um vül Göld.

So weita tuan, solaung da Herrgott wüll,

des is mei Leben und des is mei Zül.