Weihnachtsgedichte
Die Weihnachtsreform - in österreichischer Mundart

D´ Weihnochtsreform

Seit a poar Wochn siagst as - im gaunzn Laund

stengan d´ Leit in klane Gruppn beinaund.

Maunche schaun bös, aundare san gaunz bloss.

Worüber tuscheln s´ denn olle? Was is ´n do los?

A Nochbarin hot mir ´s daunn genau erklärt:

Weihnochten wird reformiert. Sie hot des scho ghert.

Bei uns wird in Zukunft ollahaund verboten,

Weihnachtsliada derf ma nimma singa noch Noten.

De Liada wern iatzt g´schützt, de schenan, olten.

De miassn mia fia de Nochwölt erholten.

Nua von ana CD klingt´s richtig und rein,

und ´s schleichn se kane folschn Töne ein.

Am Christbam derf  ka Wochskerzn brenna,

jeda muaß se a elektrische Beleichtung nehma.

´S is wegn da Umwöltverschmutzung und da Brandgefohr.

Is olls nua zu unsan Vorteil, eh gaunz klor.

Ih frog mi nua: Wieso waaß ´s des so genau,

für gwehnlich is ´s jo a net so schlau,

do sogt´s scho: “Des is vom Kommissär,

a Freind vo mir, kennt sein Chauffeur.“

Nau, do is ´s  ernst. Mia wird richti baung,

vielleicht streichn´s uns a nau den Glockenklaung?

Oda d´ Vanillekipferln? D´ Marmelad is scho furt.

´S waaß jo kana, wos se do nau olls tuat.

Oba nau is nix sicha, vielleicht haum ma a Chance

und se vagessn auf unsa klans Landl gaunz.

Doch de san hort. Pinktlich zum Nikolo,

san de Lostwägen mit d´neichn Verordnungen do.

Vorbei is mit da ruhign Weihnochtszeit,

nea renna und kafa miassn d´Leit,

toghöll beleicht und laut ghert de Nocht,

de wos uns fria den Friedn hot brocht.

Mia kafan zwenig, des is schlecht,

drum wird´s valängert iatzt, des Weihnochtsgschäft.

Aufaunga miaß ma glei noch Halloween,

daunn zaht sa se bis zum Osterhos hin.

Gfolln tuat ma goar nix, wos ih do her,

mia wiad auf amol ums Herz recht schwer.

Ih geh in de Kirchn, nua da Herrgott alloa,

kaunn uns do no hölfn, des is ma kloar.

"Solln mia wirkli so dein Geburtstog feiern,

nur Neonlicht und Lautsprecha, de leiern?

Bitte bring uns den Frieden, zag uns den Weg,

nua du host de Mocht, ´s is dei Privileg."

Gaunz inständig bet ih, foll auf de Knia.

Da Herrgott vasteht mi, so kimmt´s ma via.

Wia ih aussigeh scheint d´Sunn höll und kloar

und ma siacht a Stickerl vom blauen Himmel sogoar.

Am Weihnochtstog sölba, is ´s Wunda daunn do,

auf amol - Punkt sechse - gengan olle Lichta oh.

´S ís mucksmeisalstüll und stockfinstare Nocht.

Irgendwo hot a Kurzschluß an Stromausfoll brocht.

Ollas liegt im Finstern, du herst Glocken leitn,

siagst wia se d´Leit auf d´Mettn vorbereitn.

Mit da Sturmlatern kumman s´ um ´s Weihnochtslicht

und du siagst a de Freid in jedem Gsicht.

De Fensta wern erleicht nua vom Kerzenschein

und in die "Stille Nacht" stimman olle mit ein.

Des himmlische Kind hot ´s a heia wieda gschofft

                                            und hot uns ollen den Weihnochtsfriedn brocht.