Gedichte
Klassentreffen

Klassentreffen 2016

Sicha hobts nochdenkt und eich  iss klor

dass vor üba 70 Joahr unsa ersta Schultog woar

Gschneizt und kampelt in unsan bestn Gwaund,

samma do gstaundn de Muatta aun da Haund

Da Ernst des Lebns faungt au  - so haums uns prophezeiht

a bissl boshoft grinsant, so sans holt de Leit

Den Ernst des Lebens haum mia laung scho kennt

Wauma beim Fliegaalarm in Kölla san grennt.

S woar a horte Zeit, s hot an ollem geföhlt

doch de Leit worn zfrieden, s woar Friedn auf da Wölt

Ihr wisst es jo sölba, worts olle dabei

do erinnert ma se aun so maunchalei.

Mei erste Schultoschn des wor a echte Procht

da Sottla hot mas aus an Erdäpfelsock gmocht

Mit Leim eigschmiert und daunn rund draht

sie woar a Zumutung a scheißliches Unikat.

Mit dem Trum hob ich mi ollwl geniert

dass uns  Göld gfölt hot, hob ih erst späta kapiert.

In da 2. Klass is daunn a Ledatoschn gwesn

des wor a Freid, ih hobs bis heit net vagessn.

Oba frog ma se ehrlich, wo ist denn de Zeit

…zig Johr liegn hinta uns, de Schulzeit is weit

Mia haum im Leben wos gschofft, haum uns bewährt

Heit genieß ma de Pension, des hot an Wert.

So gaunz ohne Handy haum mia übalebt

und uns bescheidn noch da Deckn ausgestreckt.

Noch ocht Jahr Schulzeit worn mia fias Leben reif

heit reichn kaam neine, wos h net begreif.

Jetzt regieren scho unsare Enkelkinder

De Wölt draht se weita und wird imma gschwinda

oba mia lossn uns net so leicht untakriagn

und wollen sogar no den Computer kapiern.

Lochat begrüß ma jeden neichn Tog

wird a des Aufsteh scho maunchmol zur Plog

Des Lebn is sche und mocht uns nau ollwl a  Freid

Is a maunchmol nimma so recht unsa Zeit.

Uns vabindn net nur  Johre, a Rechenstunden

drum haumma uns noch längerer Zeit wieder gefundn

und wüll a kana in de Schul heit mehr geh

samma gaunz ehrlich hie und do woars a sche.